ಸಿರವಾರ: ರಾಯಚೂರಿನಲ್ಲಿ ಭಾನುವಾರ ಆಯೋಜಿಸಲಾಗಿರುವ ಶ್ರೀ ಬಾಬಾ ರಾಮದೇವಜಿ ಅವರ ಜನ್ಮ ಮಹೋತ್ಸವದ ಅಂಗವಾಗಿ, ಪಟ್ಟಣದ ರಾಜಸ್ಥಾನ ಮಾರ್ವಾಡಿ ಸಮಾಜದ ಬಾಂಧವರು ಶನಿವಾರ ಸಿರವಾರದಿಂದ ರಾಯಚೂರಿಗೆ ಪಾದಯಾತ್ರೆ ಮೂಲಕ ತೆರಳಿದರು.
ಮಹಾ ಉತ್ಸವದ ಹಿನ್ನೆಲೆಯಲ್ಲಿ ಶನಿವಾರ ರಾತ್ರಿ 9 ಗಂಟೆಗೆ ರಾಯಚೂರಿನ ಸಿಯತಲಾಬಾದ್‌ನಲ್ಲಿರುವ ಆಶಾಪುರು ಫಂಕ್ಷನ್ ಹಾಲ್‌ನಲ್ಲಿ ವಿಶೇಷ ಧಾರ್ಮಿಕ ಕಾರ್ಯಕ್ರಮಗಳು ಆಯೋಜನೆಗೊಂಡಿವೆ. ರಾಜಸ್ಥಾನದ ಪ್ರಸಿದ್ಧ ಗಾಯಕರಾದ ರವಿ ಚೌಹಾಣ್ ಹಾಗೂ ಶಿವಗಂಜ್ ತಂಡದವರಿಂದ ಭಕ್ತಿಪೂರ್ವಕ ಭಜನಾ ಸಂಧ್ಯಾವಳಿ ನಡೆಯಲಿದೆ ಎಂದು ಸಮಾಜದ ಮುಖಂಡರಾದ ವಿನೋದ ಚೌಹಾಣ್ ಸಿರವಾರ ತಿಳಿಸಿದರು.
ಭಾನುವಾರ ಬೆಳಿಗ್ಗೆ ಶ್ರೀ ಬಾಬಾ ರಾಮದೇವಜಿ ಮಂದಿರದಲ್ಲಿ ವಿಶೇಷ ಮಹಾ ಆರತಿ ಮತ್ತು ಪೂಜಾ ಕಾರ್ಯಕ್ರಮಗಳು ನೆರವೇರಲಿದ್ದು, ತದನಂತರ ಭಕ್ತಾದಿಗಳಿಗೆ ಮಹಾ ಪ್ರಸಾದ ವಿನಿಯೋಗ ನಡೆಯಲಿದೆ.
ಈ ಶ್ರದ್ಧಾ ಭಕ್ತಿಯ ಪಾದಯಾತ್ರೆಯಲ್ಲಿ ರಾಜಸ್ಥಾನ ಮಾರ್ವಾಡಿ ಸಮಾಜದ ಮುಖಂಡರು, ಮಹಿಳೆಯರು ಹಾಗೂ ಮಕ್ಕಳು ಸೇರಿದಂತೆ 80ಕ್ಕೂ ಹೆಚ್ಚು ಜನ ಉತ್ಸಾಹದಿಂದ ಪಾಲ್ಗೊಂಡಿದ್ದರು.
